1Pe 1 | BEF | STEP | Nani Pitaita, Yesu Kilisitohi aposolo nohuna bo, Hu'mau nele'mo eto hu'ehina. To Hu'mau lenele'mo ho ti'ehina bona'magita, lenali guna molo'ehinalo Ponitasi metoga hiti Galesia metoga hiti Kapatosia metoga hiti Esia metoga hiti Bitinia metoga hiti tili tele hite mine'ahana lenali'i fayahi ya'ma koyoto nolepube.

1 Peter 1

1 Nani Pitaita, Yesu Kilisitohi aposolo nohuna bo, Hu'mau nele'mo eto hu'ehina. To Hu'mau lenele'mo ho ti'ehina bona'magita, lenali guna molo'ehinalo Ponitasi metoga hiti Galesia metoga hiti Kapatosia metoga hiti Esia metoga hiti Bitinia metoga hiti tili tele hite mine'ahana lenali'i fayahi ya'ma koyoto nolepube. 2 Lenaliya afotifu, Hu'ma ai'a Sikalafu'uba lenele'mo etalibe luto to Yesu Kilisitohi kaga'a kehelite agoya hu emilabe luto lenele'mo'ehina. Ai golaha'a folo lepolo'ehina yauba komopatini okala hu lepololenogo minalabe luto Hu'mau afotinifu lu molo'ehinalo mine'ahanaguti lenele'mo eto hu'ehina yabe.

Hu'mamofihi lehe'mose'na'a to bati hu'ehinalo fuluna'a hiti lenalitoga minomo tito hofa talibe.

Kokulumagu minoba minoba huse'namofihi legeya'a geba hite lilata hilabe.

3 Lali Sipi Boti Yesu Kilisitohi afo'afihi Hu'ma ai kumu foke ka lilune. To sipi ka'ya Yesu Kilisitohi fili'ehinaguti le'mo ho ti'ehibe. L'emo ho ti'ehibe luto komopa'a sipi huto li hokolo lu limigo kosaba komopati hiti huto hulata nohune. Huto huto minomo buto minolatanamofihi legeya'a kehelito geba huto minolata nohune. 4 To fili'ehinaguti le'mo ho ti'ehina'mu luto kokulumagu amuya fe'nohi fulupa meilina'a to sibi mehilina'a to fenene mehilina'a molo lepolo'ehina yabe. To fililata'namofihi ya'ma geba hulata nohuta yamofihi minete kokulumagu tilabe luto lenele'mo babahi nohu lepalabe. 5 Ya huloto Hu'mau amuya'aloti haka fi lepele'ehinogo keheli amuya melete nehinogo kana'a su halina yana yupahi lenubuto bilina'mu yabe. Yamofihi li nupa huto huto lenele'mo bati hilinamofihi geba hite minalabe.

6 Lenali ya'mu lite lenegelo bite minelata hilo. To Hu'mau keheli'ehinogo kana'a tupa hilina yupahi keke'i luse'na'a fato fato'na guna malalina'mu yabe. Guna malalinamofihi gupisa'alo tite keke'i lite minete fa'mene lenegelo bite minalabe. 7 To hena'mube? Fono ka lu lepilugi kehelilo. Bona'magi goli efahi meluguti yuhufasi nelina kanagu mone laga mehilina'a hiti ni'inogo enali sibi logogu melelago ana logouba ya'ma laga mehilina'a lo su halina'mu yabe. Ya hilenogo goli efahi eto huto bati huto minalina'mu yabe. Ana suhi huto lenali Kilisitohi keheli amuya molose'na tito mino'ehina ni'igo ya'ma keke'i luse'na guna molo lepolose'nauba lenele'mo bati hilube'mu nohinogo amuya melete nehinogo Yesu Kilisitou ai nehetilina kanagu lenigitini le'mo saga huto lenofokehi luto nohinogo to fana meha'auba le'mo ho tito le'mo ho tinogo lenalitoga minalina'mu yabe. 8 Lenali Yesuhi meha'a bu mege'ehite sibi komopatini keheligopa hilata nehabe. To lenemehi emilata nehana yabe. Yatai kanagu ya'ma lenubutinitu ai'a bu mege'ehite ai kumu sibigopa keheli ule'ale hite neminabe. Ya nehite lenegelo bite laga'a fato'mofihi bona'magita lenabagaguti lu huto hilata menehanamo ya'ma kehelilata nehabe. 9 Hena'mube? Lenali amuya mololatanamofihi lamana yauba komopatini lenubuto bilata'na yauba lenogobisalo ni'inagihe. Ya'mu lenegelo nebibe.

10 Ana lubuto bise'namofi kumu ya'ma koyapa mono ka lu huto hi'ahana bona'i enali kehelilune lite sa sa hi'ahana yabe. To ananamomu'i Hu'mau lenalitoga lenehe'mose'na lepilube lite ya'mu ka hapa'aguti lite kaga li huto huto hite melete mine'ahana. 11 Enali ya'ma huto hilina kana'a sa sa hi'ahana, Hu'mau ya'ma Kilisitohi ho lifilina kana henaki yupahi huto huse kanagu huto hilibe lite sa sa hi'ahana. To Kilisitohi meha'a yauba komopa'anigu molo epalago enali ya'ma lenali kanagu yabe lite keheli'ahabe. Lenali kanagu Kilisitou huto huloto yalo keke'i luse'namofihi gupisalo tito fililina yalo ho tito sekele mamu'a lilina'mu yabe lite keheli'ahabe. 12 Ana ka lu huto huse bona'magi enali ma lite keheli'ahana. Ya'ma sa sa hite keheli'ahana kaga enali'ani kanagu huto hilina meni'igo lenali kanagu huto hilina ni'ibe luto Hu'mau lu hokolo hu epolo'ehina. To enali lu yege he'ahana kaga lenali yatai kanagu nekehelibe. Ya'ma Hu'mau ho lifi'ehina Sikalafu'uba kokulumaluguti limito enele'mo amuya mololago enali ka lamana'a lenalitoga lite bi'ahana bona'magi Kilisito kumu lu lepi'ahana ka ni'ibe. To ana kaga agelomagi ana hite kehelilune lite sa sa hilune'mu nehabe. Ana kaga lenalitoga huto hu'ehina ni'inagihe.

Lamana huto minaluta'mu Sipi Bouba kehe noibe.

13 Ya'mu komopatini li hokolo hite lenegekesa kehelilo. Kaba hu bati hite minete Yesu Kilisitou alihi huto hinogo ya'ma lusa gi lepalalina'a yalo'i geba hilete asaga'i keheli ule'ale hite fifa ilete minalo. 14 Hu'mamofihi keheli emite minalo. Lenali koyapa'i nehite negi nete nehago lenugufa li sibina hise kapolo melete bi'ahana. Yatai ya'ma kanagu ya suhi hite meminalo. 15 Hu'mau elesa molo lepi'ehina bo komopa'agu lamana nohinagi lenali ana suhi hite komopatinigu asaga'i lamana hite mine lite bite minalo. 16 Kaga ya'ma luto noligo mono bukugu fayahi keye'ahanamo ni'ina:Nani komopa'nigu lamana higo nohunagi lenali ana hite komopatinigu lamana hinogo minalo.

17 Lenali Hu'mamofi kumu afotifu yabe lite lu emite, nunumu hite lilata nehabe. Ai loe bomale'ititihi bu goloto moneko babeyafa ni'inogo mone bo le'malina to mone bo he'mi etalina meni'ibe. Hapa'a ya huto meni'ibe. Ai asaga bona'magihi komopa'ani bu goto hapa'ani lamana huto eto huto loko hulata nohina bo nohibe. To ya nohigo lenali panana'amagita ma metoga nehana kanagu ai kumu koli hite minete keheli emite mine lite bilo. 18 Lenali koyapa'i tatatinigi lu lepi'ahana ya'ma futu'a hapa'alo mege'i melete mine'ahanogo fa'menena lolo hu'ehibe. Lenali ana hapa'amofihi nagalugu neminago Kilisitou lenali kumu mina'a sipina he'mito gulu ho lepolo'ehinamo keheli'ahabe. Ana mina'a he'mi lepolo'ehinana siliba efahi hiti goli efahi hiti ni'ifi, o'e yana nasana mele'isi su hoto fenene hilinamo ni'ibe. 19 To lenali Kilisitohi golaha'atu mina fito gulu ho lepolo'ehina yabe. Koyapa bona'magi hetofa sipisipi yaga mone fuhe'a hena menina yaga foipana'animu su halibe lite kuguhi keye lite mamufa gilata'namofihi ya suhi hite Yesu hago lenali kumu fili'ehina. 20 To koyapa'i kokuluma'i me'i huto mehina kanagu Hu'mau le'mo ho tito ho lifigo limito bona'magihi foipana'ani'mu fili'ehina. Yanauba aliha'a kanagu su halube'mu nohinogo lenali kumu yabe luto ligo huto hu'ehina yabe. 21 Ya huto higo lenali ai kumu kehelite Hu'mamofitoga agoya hu emite neminabe. Hu'mau Kilisitohi fili'ehinaguti le'mo ho tito sekele mamu'a emito molo eto'ehina yabe. To ya higo lenali ananamomu'i kehelite amuya melete aitoga agoya hu emilata to fifa ilata nehana ni'ibe.

22 Lenali kaga lamanamofihi kehelilata hite mege'i malalana ni'igo lenalitoga hapa'a lana'mu luto lenalalutinigihi komopatinigu faga melise lenemehatini lusiga lite epilata nehabe. Ya'mu yabe lite komopatini ai eminogo ai eminogo mu tifite minalo. 23 Hu'mamofihi ka'a minoba minoba hu su mehalina kagauba lenali lenele'mo kosaba'i huto nohibe. Tatatigi filise'namofihi biha'a ya suhi huto ni'igopa Hu'mamofihi minoba minoba nohina bomofihi naga'a lolo hite neminabe. 24 yamofihi kaga'a mono bukugu keye'ahanaya, ma ni'ibe:

Bona'i silaga'magi
kifina suhi hite nehabe.
To sekele mamu'animofihi asaga'i
ya'ma kifi muko'a suhi huto ni'ibe.
Kifina mele'isi hosopa ilata higo
muko'a taloto limo ito su holata nohibe.

25 Ya huto ni'inaya, to Sipi Bomofihi kaga yauba amuya moloto minoba minoba huto minalina'mu yabe. To ana kaga ya'ma lu yege hose ka lamana'auba lenalitoga nehetigo ana kaga'ya kehelilata nehabe.